John 18
ព្រះយេស៊ូត្រូវគេក្បត់
1កាលព្រះយេស៊ូមានបន្ទូលអំពីសេចក្ដីទាំងនោះរួចហើយព្រះអង្គក៏ចាកចេញជាមួយពួកសិស្សរបស់ព្រះអង្គហើយបានឆ្លងជ្រលងកេដ្រុន។ នៅទីនោះមានសួនច្បារមួយហើយព្រះអង្គបានយាងជាមួយពួកសិស្សរបស់ព្រះអង្គទៅក្នុងសួនច្បារនោះ 2យូដាសជាអ្នកក្បត់ព្រះអង្គបានស្គាល់កន្លែងនោះដែរព្រោះព្រះយេស៊ូនិងពួកសិស្សរបស់ព្រះអង្គជួបជុំគ្នាជាញឹកញាប់នៅទីនោះ។ 3ដូច្នេះពេលយូដាសបានទទួលកងទាហានរ៉ូមនិងពួកឆ្មាំព្រះវិហារពីពួកសម្ដេចសង្ឃនិងពួកអ្នកខាងគណៈផារិស៊ីរួចហើយក៏ទៅទីនោះដោយមានកាន់គោមចន្លុះនិងអាវុធផង។ 4ព្រះយេស៊ូបានជ្រាបអំពីអ្វីៗដែលនឹងកើតឡើងចំពោះព្រះអង្គនោះព្រះអង្គក៏យាងចេញមកហើយមានបន្ទូលទៅពួកគេថា៖ «តើអ្នករាល់គ្នារកអ្នកណា?» 5ពួកគេទូលទៅព្រះអង្គថា៖ «រកយេស៊ូជាអ្នកក្រុងណាសារ៉ែត»។ ព្រះអង្គមានបន្ទូលទៅពួកគេថា៖ «គឺខ្ញុំនេះហើយ!» ឯយូដាសដែលជាអ្នកក្បត់ព្រះអង្គក៏ឈរជាមួយពួកគេដែរ។ 6ពេលព្រះអង្គមានបន្ទូលទៅពួកគេថា៖ «គឺខ្ញុំនេះហើយ» នោះពួកគេក៏ថយក្រោយហើយដួលទៅលើដី។ 7ដូច្នេះព្រះអង្គមានបន្ទូលទៅពួកគេម្ដងទៀតថា៖ «តើអ្នករាល់គ្នារកអ្នកណា?» ពួកគេទូលឆ្លើយថា៖ «រកយេស៊ូជាអ្នកក្រុងណាសារ៉ែត» 8ព្រះយេស៊ូមានបន្ទូលឆ្លើយថា៖ «ខ្ញុំបានប្រាប់អ្នករាល់គ្នាហើយថាគឺខ្ញុំនេះហើយដូច្នេះបើអ្នករាល់គ្នារកខ្ញុំចូរឲ្យអ្នកទាំងនេះទៅចុះ!» 9ដូច្នេះក៏បានសម្រេចតាមពាក្យដែលព្រះអង្គបានមានបន្ទូលថា៖ «ក្នុងចំណោមអស់អ្នកដែលព្រះអង្គបានប្រទានដល់ខ្ញុំគ្មានអ្នកណាម្នាក់ត្រូវវិនាសឡើយ»។ 10រីឯលោកស៊ីម៉ូនពេត្រុសគាត់មានដាវមួយគាត់ក៏ហូតដាវនោះកាប់បាវបម្រើរបស់សម្ដេចសង្ឃម្នាក់ហើយកាត់ដាច់ត្រចៀកស្ដាំរបស់បាវបម្រើនោះ។ បាវបម្រើនោះមានឈ្មោះថាម៉ាលកុស។ 11ព្រះយេស៊ូមានបន្ទូលទៅលោកពេត្រុសថា៖ «ចូរដាក់ដាវទៅក្នុងស្រោមវិញទៅតើមិនត្រូវឲ្យខ្ញុំផឹកពីពែងដែលព្រះវរបិតាបានប្រទានឲ្យខ្ញុំទេឬ?»ការចាប់ខ្លួន និងការសួរចម្លើយព្រះយេស៊ូ
12ពេលនោះកងទាហានរ៉ូមនិងមេទ័ពធំព្រមទាំងពួកឆ្មាំព្រះវិហាររបស់ជនជាតិយូដាបានចាប់ចងព្រះយេស៊ូ 13ហើយនាំទៅឲ្យលោកអាណជាមុនដ្បិតគាត់ជាឪពុកក្មេករបស់លោកកៃផាដែលជាសម្ដេចសង្ឃនៅឆ្នាំនោះ។ 14លោកកៃផានេះហើយដែលបានឲ្យយោបល់ទៅជនជាតិយូដាថាបើមានមនុស្សម្នាក់ស្លាប់ជំនួសប្រជាជននោះជាការប្រសើរហើយ។ពេត្រុសបដិសេធព្រះយេស៊ូលើកទីមួយ
15លោកស៊ីម៉ូនពេត្រុសនិងសិស្សម្នាក់ទៀតបានទៅតាមព្រះយេស៊ូហើយសម្ដេចសង្ឃស្គាល់សិស្សម្នាក់នោះដូច្នេះសិស្សម្នាក់នោះក៏ចូលទៅក្នុងសាលារបស់សម្ដេចសង្ឃជាមួយព្រះយេស៊ូ 16រីឯលោកពេត្រុសវិញគាត់បានឈរនៅមាត់ទ្វារខាងក្រៅដូច្នេះសិស្សម្នាក់ដែលសម្ដេចសង្ឃស្គាល់នោះបានចេញមកប្រាប់អ្នកយាមទ្វាររួចក៏នាំលោកពេត្រុសចូលទៅខាងក្នុង។ 17ពេលនោះបាវបម្រើស្រីដែលជាអ្នកយាមទ្វារក៏និយាយទៅលោកពេត្រុសថា៖ «តើអ្នកមិនមែនជាសិស្សម្នាក់របស់អ្នកនោះដែរទេឬ?» គាត់ឆ្លើយថា៖ «ខ្ញុំមិនមែនទេ!» 18ដោយព្រោះពេលនោះរងាពួកបាវបម្រើនិងពួកឆ្មាំព្រះវិហារក៏ឈរអាំងភ្លើងដែលបង្កាត់ហើយជាស្រេចរីឯលោកពេត្រុសក៏ឈរអាំងភ្លើងជាមួយពួកគេដែរ។សម្ដេចសង្ឃសួរចម្លើយព្រះយេស៊ូ
19ហើយនៅពេលនោះសម្ដេចសង្ឃបានសួរព្រះយេស៊ូអំពីពួកសិស្សរបស់ព្រះអង្គនិងអំពីសេចក្ដីបង្រៀនរបស់ព្រះអង្គ 20ព្រះយេស៊ូមានបន្ទូលឆ្លើយទៅសម្ដេចសង្ឃថា៖ «ខ្ញុំបានប្រកាសប្រាប់មនុស្សលោកនៅទីសាធារណៈខ្ញុំតែងតែបង្រៀននៅក្នុងសាលាប្រជុំនិងនៅក្នុងព្រះវិហារជាកន្លែងដែលជនជាតិយូដាទាំងអស់ជួបជុំគ្នាហើយខ្ញុំមិនដែលនិយាយអ្វីដោយលាក់កំបាំងទេ 21ហេតុអ្វីលោកសួរខ្ញុំដូច្នេះ? ចូរលោកសួរអស់អ្នកដែលបានឮសេចក្ដីដែលខ្ញុំប្រាប់ពួកគេចុះពួកគេក៏ដឹងអំពីសេចក្ដីដែលខ្ញុំបាននិយាយដែរ»។ 22ប៉ុន្តែពេលព្រះអង្គមានបន្ទូលអំពីសេចក្ដីទាំងនេះឆ្មាំព្រះវិហារម្នាក់ដែលឈរជិតនោះបានទះកំផ្លៀងព្រះយេស៊ូទាំងនិយាយថា៖ «ឯងឆ្លើយជាមួយសម្ដេចសង្ឃយ៉ាងដូច្នេះឬ?» 23ព្រះយេស៊ូឆ្លើយទៅអ្នកនោះថា៖ «បើខ្ញុំនិយាយអាក្រក់មែនចូរធ្វើបន្ទាល់អំពីសេចក្ដីអាក្រក់នោះចុះប៉ុន្តែបើល្អវិញតើហេតុអ្វីបានជាអ្នកវាយខ្ញុំ?» 24ពេលនោះលោកអាណក៏បញ្ជូនព្រះអង្គទាំងជាប់ចំណងទៅសម្ដេចសង្ឃកៃផា។ពេត្រុសបដិសេធព្រះយេស៊ូលើកម្ដងទៀត
25ពេលនោះពួកគេបានសួរលោកស៊ីម៉ូនពេត្រុសដែលកំពុងឈរអាំងភ្លើងថា៖ «តើអ្នកមិនមែនជាសិស្សម្នាក់របស់អ្នកនោះដែរទេឬ?» គាត់ក៏បដិសេធថា៖ «ខ្ញុំមិនមែនទេ»។ 26មានបាវបម្រើរបស់សម្ដេចសង្ឃម្នាក់ដែលត្រូវជាសាច់ញាតិរបស់បាវបម្រើម្នាក់ដែលលោកពេត្រុសបានកាត់ដាច់ត្រចៀកនោះបាននិយាយថា៖ «តើខ្ញុំមិនបានឃើញអ្នកនៅជាមួយអ្នកនោះក្នុងសួនទេឬ?» 27លោកពេត្រុសបានបដិសេធម្ដងទៀតហើយមាន់ក៏រងាវឡើងភ្លាម។លោកពីឡាត់កាត់ក្ដីព្រះយេស៊ូ
28បន្ទាប់មកនៅព្រលឹមស្រាងៗពួកគេក៏នាំព្រះយេស៊ូចេញពីផ្ទះលោកកៃផាទៅបន្ទាយទ័ពប៉ុន្តែពួកគេមិនបានចូលទៅក្នុងបន្ទាយទ័ពទេក្រែងលោធ្វើឲ្យពួកគេមិនបរិសុទ្ធហើយមិនអាចបរិភោគនៅថ្ងៃបុណ្យរំលងបាន។ 29ដូច្នេះលោកពីឡាត់ក៏ចេញមកខាងក្រៅសួរពួកគេថា៖ «តើអ្នករាល់គ្នាចោទប្រកាន់បុរសនេះពីរឿងអ្វី?» 30ពួកគេឆ្លើយទៅគាត់ថា៖ «បើបុរសម្នាក់នេះមិនបានធ្វើអ្វីអាក្រក់ទេនោះយើងមិនបញ្ជូនគាត់មកឲ្យលោកទេ!» 31ដូច្នេះលោកពីឡាត់ក៏និយាយទៅពួកគេថា៖ «ចូរអ្នករាល់គ្នាយកគាត់ទៅកាត់ទោសតាមច្បាប់របស់អ្នករាល់គ្នាចុះ!» ប៉ុន្តែពួកជនជាតិយូដាប្រាប់គាត់ថា៖ «យើងគ្មានច្បាប់សម្លាប់មនុស្សណាម្នាក់ទេ»។ 32នោះក៏សម្រេចតាមពាក្យរបស់ព្រះយេស៊ូដែលព្រះអង្គបានមានបន្ទូលបង្ហាញអំពីរបៀបដែលព្រះអង្គត្រូវសោយទិវង្គត។ 33លោកពីឡាត់ក៏ចូលទៅក្នុងបន្ទាយទ័ពវិញហើយហៅព្រះយេស៊ូមកសួរថា៖ «តើអ្នកជាស្ដេចជនជាតិយូដាឬ?» 34ព្រះយេស៊ូមានបន្ទូលឆ្លើយថា៖ «តើលោកនិយាយដូច្នេះដោយខ្លួនឯងឬក៏មានអ្នកណាម្នាក់ទៀតប្រាប់លោកអំពីខ្ញុំឬ?» 35លោកពីឡាត់ឆ្លើយថា៖ «តើខ្ញុំជាជនជាតិយូដាឬអី? ពួកជនរួមជាតិរបស់អ្នកនិងពួកសម្ដេចសង្ឃបានបញ្ជូនអ្នកឲ្យខ្ញុំតើអ្នកបានធ្វើអ្វីឬ?» 36ព្រះយេស៊ូមានបន្ទូលឆ្លើយថា៖ «នគររបស់ខ្ញុំមិនមែននៅក្នុងលោកិយនេះទេបើនគររបស់ខ្ញុំនៅក្នុងលោកិយនេះមែននោះពួកអ្នកបម្រើរបស់ខ្ញុំមុខជាវាយតយុទ្ធវិញមិនខានដើម្បីកុំឲ្យគេបញ្ជូនខ្ញុំទៅជនជាតិយូដាប៉ុន្តែឥឡូវនេះនគររបស់ខ្ញុំមិនមែននៅទីនេះទេ»។ 37លោកពីឡាត់ក៏សួរព្រះអង្គថា៖ «ដូច្នេះអ្នកជាស្ដេចឬ?» ព្រះយេស៊ូមានបន្ទូលឆ្លើយថា៖ «លោកទេតើនិយាយថាខ្ញុំជាស្ដេចខ្ញុំបានកើតមកក្នុងលោកិយនេះសម្រាប់ការនេះគឺឲ្យខ្ញុំធ្វើបន្ទាល់អំពីសេចក្ដីពិតហើយអស់អ្នកដែលកើតពីសេចក្ដីពិតអ្នកនោះឮសំឡេងរបស់ខ្ញុំ»។ 38លោកពីឡាត់ទូលសួរព្រះអង្គថា៖ «តើសេចក្ដីពិតជាអ្វី?» ពេលទូលដូច្នោះហើយលោកពីឡាត់ក៏ចេញទៅជួបពួកជនជាតិយូដាម្ដងទៀតហើយនិយាយថា៖ «ខ្ញុំឃើញថាអ្នកនេះគ្មានទោសអ្វីឡើយ 39អ្នករាល់គ្នាមានទំនៀមទម្លាប់ឲ្យខ្ញុំដោះលែងមនុស្សម្នាក់សម្រាប់អ្នករាល់គ្នានៅពេលបុណ្យរំលងដូច្នេះតើអ្នករាល់គ្នាចង់ឲ្យខ្ញុំដោះលែងស្ដេចរបស់ជនជាតិយូដានេះសម្រាប់អ្នករាល់គ្នាដែរឬទេ?» 40ពេលនោះពួកគេស្រែកឡើងម្ដងទៀតថា៖ «កុំលែងម្នាក់នេះ! លែងបារ៉ាបាសវិញ!» បារ៉ាបាសគឺជាចោរប្លន់។
Copyright information for
KhmKCB